الطموح



قالوا طموح ؟ وقلت ما يطمحوني
............... أهل النمايم والردا واللكاعه

قالوا جموح ؟ وقلت شوفوا أضعوني
............... صفر ومغاتيرن بعالي رفاعه

قالوا تحبين الغزل ؟ قلت لوني
............... ماهو بعيب ولا شريته بضاعه

قالوا وش أعذب طرق سيد اللحوني ؟
............... قلت الهلالي أنطرب لأستماعه

قالوا أجدودك ؟ قلت لا تنشدوني
............... اهل الكرم وأهل الصخا والبتاعه

قالوا جريه ؟ قلت والحق دوني
............... على النقا ماهو حديث الدناعه

قالوا أبوك ؟ وقلت قرة أعيوني
............... لولا وجوده ما كتبت أبراعه

قالوا أخوك ؟ وقلت قرمن حنوني
............... اليا أنتخابي في حضور الجماعه

قالوا سعدك ؟ وقلت شوف المزوني
............... في خايعن قفرن من الناس ساعه

قالوا تحبين الهدد ؟ قلت كوني
............... اليا قلب ثم حام بأقصى أرتفاعه

قالوا حبيبك ؟ قلت لا تعذلوني
............... يفداه قلبن لاعه البعد لاعه

قالوا يحبك ؟ قلت مثله يموني
............... قلبي وعقلي في أيدينه وداعه

قالوا أمير؟ وقلت لا تحرجوني
............... شيخن بطبعه ولا أمل أستماعه

قالوا يحبك ؟ قلت هذا جنوني
............... يدري وأنا أدري وطاري البعد راعه

والله ما أرخص صاحبي لو جفوني
............... كل القرايب والأهل والجماعه